TOTTENHAM GIVE ADEBAYOR LEAVE TO GO TOGO GO SETTLE JUJU WAHALA

Tottenham hotspur don give dia striker, Emmanuel Adebayor leave
to go Togo go settle di juju mata wey dey tear im family apart.
Adebayor get agro wit him mama wey him accuse of doing juju against am to kill him destiny.
Dis season for England,Adebayor neva play one beta football and dis one don make am dey believe anytin wey anybodi yarnam say be di reason why he neva play well.

Di BABALAWO WEY ACCUSE ADEBAYOR MAMA,
DEY ANSWER QUESTIONS FOR RADIO STATION FOR GHANA

Even if babalawo tellam to rob red oil for im right leg say he go score 100 goals for 10 matches, Adebayor ready to do am bicos he imsef no undastand how he take loose form like dis.
Tottenham don bicos of all dis wahala givam leave to go sort out imsef and im family.

WHY I HATE MANCHESTER-ANGEL DI MARIA

Manchester United winger Angel Di Maria wey dey injured presently,don yarn say na only one ting dey scata him dada for England.
He say life for England dey tire ram for only one reason.
Messi teammate for Argentina squad,Di Maria say, day too dey quick dark and cold,won killam for di city of Manchester. He say e no be like dat at all at all for Spain.
Di forma Real Madrid player say,he nor get any problem with di wackis or any oda ting for Manchester bicos di difference no much bitwin wetin im dey eat for Spain bifor.
He say di only problem na di cold wahala.

TAYO DON WIN "BIG BROTHER AYIRI"(BBA)

Dem say if one way close anoda one go open.
Tayo Faniran, di naija guy wey carry 2nd for dis year Big Brother Africa hotshot, don win Big Brother AYIRI.
Di money wey Idris Sultan from Tanzania kolobi as winna for BBA, no near wetin Warri billionaire, Ayiri Emami don promise to give Tayo.
Big Brother Africa give Idris $300,000 why Big Brother Ayiri give Tayo $350,000.
No be today Ayiri don dey do sheyt for pipo as he recently buy one wicked rolls Royce dash he wife for her birthday and also give 2face about 40milla for him wedding wit Annie Macaulay Idibia.
But come to tink of am, dis 350,000 dollars wey be N64Million naira for naija money,wey Ayiri won give dis bobo,go do many tings for him cominiti and go provide plenti job for di life of plenti youth wey no get job if he use am build industry instead of am to carry am give one pesin all in di name of Big brother.

CARLOS TEVEZ DRAW 'ANGELS' AS TATTOO TAKE COVER EVERYWHERE FOR HIM BACK

Abeg, hep me phone Wiz Khalifa and Lil Wayne dis morning say, make dem pause and wait to find out who apart from Tonto Dike don join dem for di tattoo madness.
Dia new memba na Juventus of italy striker, Carlos Tevez, wey don draw tattoo take cover everywia for im back.
He put di picture of im bodi tattoo for twitter yestaday and na angels naim he draw for di back.
Di forma Manchester United and Manchester City player, wey carry im bag waka comot for England and enta Italy go kontiniu im football career with Juvey, pose wit one man wey we biliv say naim draw di tattoo as he write for unda di picture say,
"tank you frend for dis wondaful tattoo wey u sketch for my back.na you be di baba of all baba for dis tattoo job".

TORTURE HOUSE GIRL FOR UGANDA FIT SPEND 15 YEARS FOR PRISON

Di Uganda house girl, Jolly Tumuhirwe,wey shock di world wit di way wey she take nearly beat 18 month old pikin,baby Aneela nearly die, don admit say she dey guilty for evritin wey dem charge am for as she appear for court.
Di whole world see wetin dis heart of stone girl do to di innocent pikin for di CCTV camera wey her papa put to monitor anytin wey dey appun for di hause.
On Monday bifor magistrate Moses Nabende for court, di house girl say she dey veri sorry for wetin she do to di baby.she say make di papa,her mama and di world forgive her bicos na devil cause am.
Bicos of di beg wey she beg, di court don shift her case go Wednesday and na dat wednesday she go find out her punishment wey fit dey up to 15 years akordin to di law for dia.

BABY ANEELA, HER MOMSIE AND POPSIE FOR INSIDE COURT TODAY

I DEY READY TO SIGN FOR D'BANJ AND DB RECORDS-ORITSEFEMI

One of di most successful musician dis year for naija, Oritsefemi don yarn say if D'banj givam offer to sign for im label, DB records, im go sign one time.
Oritsefemi wit im manager, Danku,sorvive arm robbery attack for Ikorodu road on sunday and damage di range rover wey im management team, Avatar entertainment just dasham.
Di forma memba of di group, Junglist, say im and D'banj closeness don pass 5 and 6 already and dem even join bodi and voice do di remix of im baddest song, double wahala.
He say na di kokomasta imsef dey introduce am to many compinis and from next year, im go sign some kain wicked deals.
Oritsefemi say many of dis pipo dem know im songs but dem no know am one on one but D'banj don make tings and di connections veri easy.
He say dem don alreadi dey work like brodas so, if D'banj say, oya femolala sign for DB records, he say he dey veri possible say him fit sign.

COMPARE ME WITH MALE MUSICIANS NOT FEMALE ARTISTES-CYNTHIA MORGAN

As a female, she get evritin wey woman dey get but if you see di reggae and dancehall queen Cynthia Morgan, make u no go do mistake call her  female artiste but call am "musician".
Akordin to di Edo born biutiful chikito wey dey sing wit plenti power, she say,she no dey di same class wit di rest female artiste dem bicos none of dem dey do di kind music wey she dey do.

Cynthia Morgan, di Northside records first lady say,if u listen to her jams, u go know say she no dey sing soft like your evriday female artiste.
She say she don reach dat stage wey be say, pipo no dey borda to compare her wit girls again but dem dey compare ram wit men wey sabi.
She say make all her fans and music lovers expect her album first or second quarter next year bicos she stil dey try to add salt and maggi to di music wey she dey cook.
She also yarn say she go work and do collabo wit some oda top musicians including P-square dem wey she say na must for di album.
Cynthia release one latest song last week wey she call,"popori and e dey really dey totori many radio stations right now.