AYIRI DON REPLACE ORITSEFEMI DAMAGED MOTOR WITH BRAND NEW SUV

6 days afta Oritsefemi management compini, Avatar Entertainment dasham new Range Rover Evoque Jeep, di bobo alongside im manager, Dankun,kon get accident on di 7th of decemba and di ride just kpafucate and scata beyond repia.
But good news don come di way of di double wahala singa as Wafficana, Ayiri Emami don buy fresh SUV car givam.

B4 di accident

Oritsefemi naim yarn dis one wit him own mouth last night for di 2014 Headies award night wen he receive di Best street hop award wit im jam,double wahala wey scata many pipo area.
Wit dis car wey he dash Oritsefemi,Warri biggest name, Ayiri, don turn naija entataynas fada krismas as he don bless many artiste wit gifts and money.
Rumors wey enta town last week be say di same Ayiri dash Tayo,naija representa for Big broda Africa dis year 350,000 tausand dollars bicos he come naija wit empti pocket as he carry second position.
Na only who take first dem dey give all di 300,000 dollars to and na Tanzania Idris Sultan be di lucky bobo dis year.

DI FIRST EVER MISS NIGERIA IN 1957. BIFOR AND NOW ( PHOTO)

Who fine don fine as di biutiful Grace Atinuke Oyelude show for her new photo say she still fine like mamiwater and na she be di first miss Nigeria for 1957.
During dat time, di girls wey dey contest na picture dem dey send go give Daily times newspapers for Eko.
From di pictures,dem go kon select di finalists wey go contest live for di finals for Lagos island club.
Dat time miss Nigeria no involve swimsuit,bikini, pants and bra competition.
For 1957, wen Grace Oyelude wey be 83 years old now contest and represent di northern area, she stil dey work dat time for United African Company(UAC).
Now for miss Nigeria,dem dey win millions of naira, brand new car, endorsements and oda jolliment but dat time, na £200 pounds naim dem give Atinuke for first position and inside dat moni, she use some travel go obodo oyibo go study nursing for di Royal College of Nursing for England.

WIZKID DON BEAT DAVIDO AS NIGERIAN MUSICIAN WITH DI MOST TWITTER FOLLOWERS FOR 2014

NUMBER 1

Di holla at your boy singer, Wizkid don send warning signal to Davido camp say him dey ready to be di man to beat come 2015 as twitter don crownam as di Nigerian artiste wit di largest followers for twitter for 2014.
Even di richest black man for di world, Aliko Dangote stil dey creep to rich one million followers for twitter. 

Wizzy get 1.3 million followers and naim be di first Nigerian artiste to reach 1 million followers for twitter.

Davido take 2nd position wit 1 million followers, D'banj carry 3rd and Don Jazzy take 4th.

Wizkid play second fiddle to him biggest rival Davido dis year as Davido win almost all di awards wey dey available to bicom naija most successful artiste for 2014.

For dis music wey dem dey play,I go siddon dey watch to see weda dis recognition go ginger Wizkid to be di boy to beat come 2015 or Davido go kontiniu for wia him stop next year or someone else go top dem and steal di shine comot for dia hand.

TOTTENHAM GIVE ADEBAYOR LEAVE TO GO TOGO GO SETTLE JUJU WAHALA

Tottenham hotspur don give dia striker, Emmanuel Adebayor leave
to go Togo go settle di juju mata wey dey tear im family apart.
Adebayor get agro wit him mama wey him accuse of doing juju against am to kill him destiny.
Dis season for England,Adebayor neva play one beta football and dis one don make am dey believe anytin wey anybodi yarnam say be di reason why he neva play well.

Di BABALAWO WEY ACCUSE ADEBAYOR MAMA,
DEY ANSWER QUESTIONS FOR RADIO STATION FOR GHANA

Even if babalawo tellam to rob red oil for im right leg say he go score 100 goals for 10 matches, Adebayor ready to do am bicos he imsef no undastand how he take loose form like dis.
Tottenham don bicos of all dis wahala givam leave to go sort out imsef and im family.

WHY I HATE MANCHESTER-ANGEL DI MARIA

Manchester United winger Angel Di Maria wey dey injured presently,don yarn say na only one ting dey scata him dada for England.
He say life for England dey tire ram for only one reason.
Messi teammate for Argentina squad,Di Maria say, day too dey quick dark and cold,won killam for di city of Manchester. He say e no be like dat at all at all for Spain.
Di forma Real Madrid player say,he nor get any problem with di wackis or any oda ting for Manchester bicos di difference no much bitwin wetin im dey eat for Spain bifor.
He say di only problem na di cold wahala.

TAYO DON WIN "BIG BROTHER AYIRI"(BBA)

Dem say if one way close anoda one go open.
Tayo Faniran, di naija guy wey carry 2nd for dis year Big Brother Africa hotshot, don win Big Brother AYIRI.
Di money wey Idris Sultan from Tanzania kolobi as winna for BBA, no near wetin Warri billionaire, Ayiri Emami don promise to give Tayo.
Big Brother Africa give Idris $300,000 why Big Brother Ayiri give Tayo $350,000.
No be today Ayiri don dey do sheyt for pipo as he recently buy one wicked rolls Royce dash he wife for her birthday and also give 2face about 40milla for him wedding wit Annie Macaulay Idibia.
But come to tink of am, dis 350,000 dollars wey be N64Million naira for naija money,wey Ayiri won give dis bobo,go do many tings for him cominiti and go provide plenti job for di life of plenti youth wey no get job if he use am build industry instead of am to carry am give one pesin all in di name of Big brother.

CARLOS TEVEZ DRAW 'ANGELS' AS TATTOO TAKE COVER EVERYWHERE FOR HIM BACK

Abeg, hep me phone Wiz Khalifa and Lil Wayne dis morning say, make dem pause and wait to find out who apart from Tonto Dike don join dem for di tattoo madness.
Dia new memba na Juventus of italy striker, Carlos Tevez, wey don draw tattoo take cover everywia for im back.
He put di picture of im bodi tattoo for twitter yestaday and na angels naim he draw for di back.
Di forma Manchester United and Manchester City player, wey carry im bag waka comot for England and enta Italy go kontiniu im football career with Juvey, pose wit one man wey we biliv say naim draw di tattoo as he write for unda di picture say,
"tank you frend for dis wondaful tattoo wey u sketch for my back.na you be di baba of all baba for dis tattoo job".